馬萬祺身為「澳門三大家族」嘅話事人之一，坊間一直流傳佢嘅後人第時會繼何家同崔家之後，有望成為下一任嘅澳門特首。預測係咪準確，將來自有分曉。講返馬萬祺本人，佢因為「親中」而多次被暗殺，令佢嘅一生增添幾分傳奇色彩。

馬萬祺第一次被暗殺係喺1949年，當年澳門中華總商會會員大會選出第38屆嘅領導層，馬萬祺就被選為副理事長。喺當年嘅就職典禮上面，據說馬萬祺發現一個花籃，上面寫住「鞠躬盡瘁」四個大字。馬萬祺當堂覺得有啲古怪，就叫工友將籃入面嘅鮮花拎出嚟，發現原來入面收埋個金屬物體，報警之後查明果個金屬物體竟然係一顆計時炸彈。

去到1951年嘅一個冬天夜晚，澳門中華總商會三樓辦公室嘅一盆花突然爆炸，據報由於當時已經係深夜，加上下晝有工友幫盆花淋過水，意外整濕咗個炸藥，先大大減低咗炸彈嘅威力。而第三次就喺1952年嘅春天，馬萬祺住所近馬路嘅一面牆忽然爆炸，度牆被炸出一個大窿，好彩當時冇人喺後院。澳門政府後來破獲一個國民黨特務組織，顯示馬萬祺已經被佢哋列入黑名單，而上述三宗暗殺都係出自佢哋嘅手筆。

除咗暗殺事件之外，馬萬祺生前作為澳門大亨嘅事蹟，好似佢喺「關閘事件」入面介入中葡衝突，排難解紛咁，都值得大家細味。當時中國同殖民地澳門嘅相處唔係表面咁風平浪靜，話說接壤內地同澳門嘅地點就叫關閘，五十年代果陣，中葡雙方都有駐兵把守關閘。而就喺1952年7月中，兩個解放軍同葡籍哨兵起咗衝突，葡國士兵就持步槍開火，引發「關閘事件」。衝突爆發之後，廣東省即刻切斷輸送去澳門嘅糧食、水果同蔬菜等物資，澳門社會一度陷入大混亂，當時嘅澳門經濟局長羅保就委託馬萬祺同另一個澳門巨人何賢做代表同中方談判。馬萬祺同何賢為咗解決爭議，先後18次去珠海白石解放軍指揮部度談判，先成功令澳葡政府向中國遞交道歉書同埋賠款。